बिमल गुरुंगको आरोपमा बिभिन्न राजनैतिक दलहरुको प्रतिक्रिया शुरु

माओवादी कालेबुंग पसेको कुरा गरेर बिमल गुरुंगले जनताम भ्रम फैलाऊने कोशिश गरिरहेको अभागोली अनि माकपाको आरोप

डी० के० वाइबा:कालिमन्यूज,कालेबुंग 7 फरवरी: दार्जीलिंग पहाडमा पुन; एकचोटी राजनैतिक वाक युद्ध शुरु भएको छ | मोर्चा प्रमुख बिमल गुरुङले कालेबुंगमा दिएको भाषण संगै आजदेखी वाक युद्ध चर्किएको छ | मोर्चा प्रमुख गुरुङले कालेबुंगमा १५ - २० जना माओवादी पसेर भूमिगत प्रशिक्षण दिरहेको बताएपछि अभागोलीले कडा प्रतिक्रिया जनाएको छ | अभागोलीका महा सचिव प्रताप खातीले उक्त विषयमा तिखो प्रतिक्रिया व्यक्त गर्दै मोर्चा प्रमुख बिमल गुरुङलाई कालेबुंगमा माओवादी पसेको छ भन्ने कुरा कसरी थाहा भयो भन्ने प्रश्न तेर्साए | यस विषयमा खुफिया विभागले बिमल गुरुङलाई यथासिग्रह सोधपुछ गर्नुपर्ने तिनले माग गर्दै के तिनी आई० बी० डी० आई० बी० भन्दा पनि ठुलो हुन् भनी प्रश्न गरे | यसै सन्दर्भमा तिनले हाल कालेबुंगमा माओवादी पसेको छ भन्ने कुरा गरेर जनतामा आतंक सृजना गर्ने कार्य गरिरहेको आरोप लगाउँदै गुरुङले आफ्नो उक्त भड्काउ बयान १५ दिन भित्रमा फिर्ता लिनुपर्ने नत्र मुद्दा दर्ता गर्ने खातीले चेतवानी दिएका छन् | गुरुङले स्थानीय च्यानल कर्मीहरुलाई धम्की दिएकोमा प्रतिक्रिया गर्दै दार्जीलिंग पहाडमा राजाको जस्तो तानाशाह शासन नचल्ने बताए | तिनले टास्क फोर्सले कुनै भूमिगत प्रशिक्षण नदिने दाबी गर्दै यस्तो झुटो आरोप लगाएर जनतामा आतंक सृजना गर्ने कार्य प्रशासनले हस्तक्षेप गर्नुपर्ने माग गरे | यसै सन्दर्भमा खातीले यस्तो भुमिगत प्रशिक्षण गोजमुमोले नै जीएलपीलाई दिरहेको आरोप लगाउँदै जीएलपीको विषयमा पुलिस प्रशासनले जाँच गर्नुपर्ने माग गरेका छन् | अरोतिर तिनले हाल मदन तामांग हत्याकाण्डमा गोजमुमोले आरोपीलाई पैसा दिएर किन्ने कार्य गरिरहेको आरोप थोपेका छन् | यस विषयमा अभागोलीले सीबीआईलाई अव्गात गराएको बताउँदै मदन तामांग हत्याकाण्डमा सीबीआइले मोर्चा प्रमुख बिमल गुरुङ अनि रोशन गिरीलाई यथा सिग्रह केरकार गरेर पक्राउ गर्नुपर्ने माग गरेका छन् | अर्कोतिर माकपा नेता तारा सुन्दासले पनि बिमल गुरुङको बक्तव्य प्रति तिब्र प्रतिक्रिया जनाएको छ | तिनले बिमल गुरुङले व्यर्थैको कुरा गरेर जनतामा आतंक फैलाउने कार्य गरिरहेको आरोप लगाए | यसै सन्दर्भमा गुरुङले तारा सुन्दासले राशनको मात्र कुरा नगर्नु भन्ने बक्तब्यको तिखो प्रतिक्रिया जनाउदै हामी सरकारी राशन खाने मान्छे हौ भन्दै राशन कार्ड नभएका मान्छेहरुले राशन पायो पाएन भन्ने कुरा नउठाउँदा हुन्छ भने | साधारण जनताको दुख नबुज्ने नेताहरुले समस्या नबुझ्ने दाबी गर्दै जनताले राशन पायो पाएन भन्ने कुरा राशन कार्ड नै नभएको नेताहरुलाई कसरी थाहा हुन्छ भनी प्रश्न गरे | यसै क्रममा तिनले कालेबुंगका पत्रकारहरुलाई गुरुङले दिएको धम्कीबारे प्रतिक्रिया गर्दै गणतन्त्रको चौथो स्तम्भ मानिने पत्रकारहरुलाई राजनैतिक हस्तक्षेप गर्न उचीत नरहेको बताए | यसबारे प्रशासनले कडा कारवाही गर्नुपर्ने सुन्दासले माग गरेका छन् | अर्कोतिर कालेबुंगमा माओवादी पसेको कुरालाई दार्जीलिंग पुलिसका अधिक्षकले पुलिस विभागमा कुनै जानकारी नरहेको बताएका छन् |

बिमलको गुरुंगको आरोपमा छत्रको सुब्बाको जवाब

थोत्रे जीटीएमा मलाई भुल्याउँन नखोज्नु – छत्र सुब्बा

डी० के० वाइबा:कालिमन्यूज,कालेबुंग 7 फरवरी: गोर्खा लिबरेशन अर्गनाइजेशन ( जीएलओ) प्रमुख छत्र सुब्बा माथि लगाएका सम्पूर्ण आरोपहरुको ठाडो जवाब दिएका छन् |भारतीय गोर्खा भूतपूर्व सैनिक एवम अर्ध सैनिक मोर्चाको चौथो स्थापनादिवसमा जसरी मोर्चा प्रमुख बिमल गुरुङले आक्रमण शैलीमा छत्र सुब्बा माथि बर्सिए ठीक त्यस्तै आक्रमण शैलीमा सुब्बाले कडा प्रतिक्रिया जनाएका छन् |तिनलेसुवास घिसिंग हम्लाकाण्डको आरोपमा आफूलाई जेलमुक्त गराउन मोर्चा प्रमुख बिमल गुरुङले राज्यका मुख्य मन्त्री ममता ब्यनार्जीसित व्यक्तिगतअनुरोध गरेको दाबीलाई खण्डन गर्दै आफूलाई बिमल गुरुङले निकाल्ने कार्य नगरेको दाबी गरे | दार्जीलिंग पहाडका राजनैतिक दल क्रान्तिकारी मार्क्सवाद कम्युनिस्ट पार्टी ( क्रामाकपा) ले आफू जेलमा हुँदा मुक्तिको निम्ति आवाज उठाउदा बाधा दिने कार्य गरेको दाबी गरे | गोजमुमो प्रमुख गुरुङले आफ्नो मुक्तिको निम्ति मुख्य मन्त्रीसित कुराकानी गरेको बताएर जनतामा भ्रम फैलाउने काम गरिरहेको तिनले दाबी गरे | यति मात्र होइन तिनले जनताबाट श्रेय बटुल्न छत्र सुब्बाको मुक्तिको निम्ति मोर्चाले पहल गरेको समचार पत्रमा लेखे भने वास्तविकरुपमा भने केही नगरेको थप दाबी गरे | यसैक्रममा तिनले पत्रकारहरुसित कुराकानी गर्दै गत केही महिना अघि रेली खोलाको बगरमा बिमल गुरुङसित भएको भेटमा गोर्खाल्याण्डको आन्दोलन अघिबढाउन सहयोग मागेको आरोप स्वीकार गर्दै आन्दोलनको निम्ति जनता भएको पार्टीको नातामा सघाउन पर्छ भनेको बताए | यधपि अहिले मोर्चाले जन समर्थन गुमाईसकेको कारण आफूलाई मोर्चाको सहयोग नचाहेको स्पष्ट पारे | यसै अवधि तिनले छुट्टै राज्यको आन्दोलन अघि बढाउने नेताहरुमा आफूमात्र एकमात्र इमान्दार नेता रहेको दाबी गर्दै बिमल गुरुङ गलत नेता रहेको ठोकुवा गरे | तिनले भने " मैले सुबास घिसिंगले शुरु गरेको छुट्टै राज्य गोर्खाल्याण्डको आन्दोलनमा साथ दिए | तर तिनले दागोपापमा सम्झौता गरेर घात गर्ने काम गर्यो | उक्त समय मोर्चा प्रमुख बिमल गुरुङले पनि समर्थन गरेर घिसिंग कै साथ लाग्यो | केवल म मात्र एकजना नेता हुँ जुन घिसिंगले सम्झौता गरेको दागोपापमा लिखित विरोध जनाएर गोर्खाल्याण्ड आन्दोलन गरेको थिए | " तिनले आफूलाई कसैले पनि किन्न नसक्ने र आफू मुद्दा र जातिको निम्ति बिक्री नभएर गोर्खाल्याण्ड आन्दोलन अघि बढाउने नेता रहेको ठोकुवा गर्दै बिमल गुरुङ नै गोर्खाल्याण्ड मुद्दा अघि सारेर जीटीएमा बिक्री भएको तिनले आरोप लगाए | सुब्बाको बुद्धि जिरो रहेको मोर्चा नेता गुरुङले लगाएको आरोपको जवाब दिंदै मेरो बुद्धि जिरो भएर नै सायद आझै गोर्खाल्याण्ड भनिरहेछु अनि बुद्धि धेर भएकाहरुले चाहिँ जीटीएमा सम्झौता गरेको होलान भन्दै गुरुङ प्रति व्यंग कसे | मोर्चा प्रमुख बिमल गुरुङले छुट्टै राज्य गोर्खाल्याण्डको आन्दोलन अघि बढाउन छत्र सुब्बाको कुनै रणनीति छैन भन्ने आरोपको जवाब दिंदै आन्दोलनको रणनीति बारे बिमल गुरुङले नदुखाउनु भने | तिनले आफूलाई जीटीएको सत्तामा बस्न चाहे राखिदिन्छु भन्ने गुरुङको बक्तब्यलाई खण्डन गर्दै मेरो निम्ति जीटीए थोत्रे कुरा हो अनि यस्तो थोत्रे व्यवस्थामा छत्र सुब्बाले लोभ गर्छ भन्ने सोंच नराख्नु भनि ठाडो जवाब दिए | यसै सन्दर्भमा तिनले आफूलाई सरकारको पक्षबाट पहिले नै ग्रेटर अटोनोमसको अफर आएको अनि उक्त अफरमा तराई डुवर्स समावेश रहेको दाबी गर्दै गोर्खाल्याण्ड बाहेक अन्य कुनै पनि व्यवस्थामा आफूले सम्झौता नगर्ने अडान राखेको दाबी गरे | तिनले गोर्खाहरुको राष्ट्रिय सुरक्षा नबोक्ने कुनै पनि व्यवस्था स्वीकार नगर्ने अनि यस्तो थोत्रे व्यवस्था जीटीएमा छत्र सुब्बालाई लोभ देखाएर भुल्याउछु भन्ने आँट समेत नदेखाउनु भनि चुनौती दिएका छन् | अहिले मोर्चाले जीटीए थाप्न कस्तो बाध्यता पर्यो भन्ने प्रश्न गर्दै सम्पूर्ण आन्दोलनमा जनताले साथ र सहयोग दिंदा जीटीएमा सम्झौता गर्नु जनतालाई छलको राजनीति गर्नु हो भनि स्पष्ट पारे | तिनले आफू अघि मोर्चा नेताहरुले लगाएका सम्पूर्ण आरोपहरु निराधार रहेको दाबी गर्दै यस्तो झूटो आरोप लगाएर जनतामा भ्रम सृजना नगर्नु भन्दै सुझाउ दिएका छन् |

जीएलओको ब्यानरमा पुन: गोर्खाल्याण्डको आन्दोलन शुरु गर्ने छ्त्र सुब्बाको घोषणा

डी० के० वाइबा:कालिमन्यूज,कालेबुंग 7 फरवरी: पुरानै राजनैतिक झण्डा अनि पुरानै चर्चित गोर्खाल्याण्ड आन्दोलनका जंगी नेता छत्र सुबाले नयाँ सोंच र नयाँ अवधारणामा छुट्टै राज्य गोर्खाल्याण्ड आंदोलन शुरु गर्ने घोषणा गरेका छन् | तिनले उक्त घोषणा आज पत्रकारहरुलाई सम्बोधन गर्दै भनेका हुन् | छत्र सुब्बाले भने " गोर्खाल्याण्डको अब हुने नयाँ आन्दोलन पुरानै राजनैतिक दल गोर्खा लिबरेशन अर्गनाइजेशन ( जीएलओ) पार्टीको ब्यानरमा हुनेछ | यसको झण्डा पनि पुरानै हुनेछ अनि नेता पनि पुरानै र मेरो टोपी पनि पुरानै हुनेछ | " तिनले पुरानै झण्डा र दलको ब्यानरमा छुट्टै राज्यको आन्दोलन अघि बढाउने भएतापनि यसको शैली र कार्य पद्वति भने नयाँ हुने बताएका छन् | पत्रकारहरुसित कुराकानी गर्दै छत्र सुब्बाले आफू मात्र कुनै पनि व्यवस्थामा विक्री नहुने नेता रहेको दाबी गर्दै अब हुने आन्दोलन अहिंसात्मक र गणतान्त्रिक तरिकाले गरिनेछ भने | यसै क्रममा तिनले पुरानो दल जीएलओको ब्यानरमा आन्दोलन शुरु गर्ने भएको भए पनि एउटा सभा राखेर जनताको आकाक्षा बुझ्ने बताउँदै यदी जनताले पार्टीको नाम र झण्डा परिवर्तन गर्ने अनुरोध गरे त्यसलाई सहर्स स्वीकार गर्ने पत्रकारहरुलाई जनाए | सुब्बाले आफूले छुट्टै राज्य गोर्खाल्याण्ड कसरी चलाउनु पर्छ भन्ने कुरा आजभन्दा २० - २५ वर्ष अघि नै सोंचि सकेको पनि प्रष्ट पारे | तिनलाई केही दिन अघि दार्जीलिंग पहाड लगायत तराई डुवर्सको भ्रमण बारे प्रश्न गर्दा " म गोर्खाल्याण्ड प्रेमी नेता हुँ, त्यसैले गोर्खाल्याण्ड प्रेमी जनताको बिचार बुझ्न जही पनि घुम्ने मेरो अधिकार छ " भने | दार्जीलिंग पहाडमा छुट्टै राज्यको निम्ति आफूमात्र एक्लो निस्वार्थ मुद्दा र जाति प्रेमी नेता रहेको दाबी गर्दै म पानी बेचेर आफ्नो जीवन चलाउछु त्र माटो र जाति बेच्ने काम गर्दिन भने | तिनले सुबास घिसिंगले दागोपापमा सम्झौता गरेर जाति र माटोको मुद्दा बेचेको अनि अहिले बिमल गुरुङले जीटीएमा माटोको आन्दोलन थन्काएको दाबी गरे | हाल गोरामुमोले उठाईरहेको छैटौ अनुसुचीको मुद्दा विषयमा प्रश्न गर्दा यस्ता चान चुने मुद्दाहरुमा सोच्ने मेरोमा फुर्सद छैन किन भने म केवल गोर्खाल्याण्डको मुद्दा मात्रै सोचिरहेको छु भने | यसै सन्दर्भमा सुब्बाले यस गोर्खाल्याण्डको आन्दोलनमा सम्पूर्ण गोर्खाल्याण्ड प्रेमी जनताहरुले साथ दिनुपर्ने आह्वान गरे | तिनले जीटीए विषयमा टिप्पणी गर्दै मोर्चा नेताहरुका निम्ति जीटीए भयङ्कर होला नत्र मेरो निम्ति यो थोत्रे व्यवस्था हो भने | दार्जीलिंग पहाडमा चलेको राजनैतिक चलखेलको शिकार बनेर आफूलाई बिनाकारण जेलमा राखेको बताउँदै अहिले न्यायलयले सम्मानपुर्वक निर्दोष रहेको बताउँदै जेलबाट छोडेको अनि यसबारे कसैले नकारात्मक टिप्पणी नगर्नु भनि सुझाउ दिए | तिनले सुप्रिम कोर्टमा पब्लिक लिटीगेशनमा मुद्दा दर्ता गरेको अनि यसबारे चाडै पर्दाफास हुने सुब्बाले जनाए | तिनले गोर्खाल्याण्डको आन्दोलन गर्ने घोषणा गरेतापनि समय र महिना निश्चित नभएको अनि यो पनि चाडै निश्चित हुने बताएका छन् |

कालेबुंगमा दश पन्द्रजना माओवादी पसेर भुमिगत प्रशिक्षण दिईरहेको बिमलको दाबी....जीटीएको सत्तामा आर0 बी0 राई अथवा छत्र सुब्बा बस्न चाहे राखिदिनेछौ – बिम.

डी० के० वाइबा: कालिमन्यूज, कालेबुंग 6 फरवरी: “कालेबुंगमा १५ - २० जना माओवादीहरु पसेका छन् | गोर्खाल्याण्ड टास्क फोर्सले यो अण्डर ग्राउण्ड ट्रेनिंग दिदैछ। यो कालेबुंगको निम्तिराम्रो संकेत होइन | यसबारे खुपिया विभागका मानिसहरुले ध्यान दिनपर्छ |राज्यका मुख्य मन्त्रीलाई यस विषयमा कुराकानी गर्नेछु | हाम्रा युवाहरुले विभिन्न जंगलहरुमा ट्रेनिंग भइरहेको कुरालाई ध्यान पूर्वक खोजी गर्नुपर्छ| हामी हिंसामा विश्वाश गर्दैनौ तर यहाँ कसले माओवादीहरु भित्राएर हिंसा गर्न खोज्दैछ यो सहन गरिने छैन ” - उक्त कुरा गोर्खा जनमुक्ति मोर्चा अध्यक्ष बिमल गुरंगले भनेका हुन् | गोजमुमोको भातृ संगठन भू० पु० सैनिकमोर्चाको चौथो स्थपना दिवस समारोहमा यहाँको टाउन हलमा मोर्चा प्रमुख बिमलगुरुङले कालेबुंगमा माओवादी भित्रिएको दाबी गरे | यस अवसरमा बोल्दैगुरुङले पहाडका विपक्षी राजनैतिक दल क्रामाकपा , माकपा, गोर्खाल्याण्ड टास्क फोर्स तथा जीएलओ प्रमुख छत्रे सुब्बा माथि आक्रमक शैलीमा आलोचना गरे | तिनले जीटीए गठन गर्नमा सरकारले दिनोदीन बिलम्ब गरिरहेको सन्दर्भमा तिखो प्रतिक्रिया व्यक्त गर्दै आगमी २७ मार्च सम्म गठन हुनपर्ने नत्र १७ अप्रेल देखि पुन: छुट्टै राज्य गोर्खाल्याण्डको आन्दोलन अघि बढाउने कुरा दोहोराए | यसै अवधि तिनले आफुहरुले जीटीएको विरोध नगरेको तर सरकारले ६ महिना भित्रमा गठन गर्नेछु भनेर सम्झौता लेखेकै कुरालाई उल्लंघन गर्दा हाम्रो असन्तुष्टि रहेको गुरुङले भने | तिनले सरकारले ६ महिनाको समयअवधिमा जीटीए गठन नगरेको कारण मोर्चाको तर्फबाट २ महिनाको थप समय दिएको बताउदै उक्त समयमा पनि गठन नगरेको खण्डमा मोर्चाले जीटीए त्यागेर पुन:आन्दोलनमा उत्रिने चेतवानी दिए | यस आन्दोलनका निम्ति मोर्चाको सम्पूर्ण भातृ संगठनहरुलाई तयार बस्नुपर्ने तिनले निर्देश दिएका छन।

छत्रे सुब्बाको फाल्यटर टोपी राम्रो छ तर बुद्दी जिरो छ

कार्यक्रमलाई सम्बोधन गर्दै मोर्चा प्रमुखले जीएलओ प्रमुख छत्रे सुब्बा माथि धेरै बर्सिए | तिनी आफ्नो साम्बोधनको क्रममा जीएलओ प्रमुख छत्र सुब्बा सित बर्सिन्दै क्रामाकपा पार्टीले नचायो भन्दैमा धेर नाँच्नु नहुने सुझाव दिए। रेलीमा भएको भेट असामयिक भेट भएको दाबी गर्दै उक्त भेटघाटबारे राजनैतिक दलहरुले राजनीति शुरु गरेको आरोप लगाए।| रेलीमा भएको भेटमा दाजु भाइको सम्बन्धमा कुराकानी गरेको बताउदै उक्त भेट अवधि सुब्बाले आन्दोलन अघि बढाउन आफुलाई आइरहेको प्रस्ताव बताएको गुरुङले दाबी गरे| तिनले भने – “ कार्यक्रममा आएका मान्छेसित भेट गरिदिने रिक्यूएस्ट आउँदा मैले छत्र दाजुलाई भेटेको हूँ। यसै बेला बात गर्दा तिनले मलाई भाईहरुले आन्दोलन गरुँ भन्दै भेट गर्न आउँदैछ भनेका थिए अनि मैले आन्दोलन गर्छौ भने गर्नुहोस भन्दा भाईले सपोर्ट गर्नुपर्छ भने। यदि आँट छ भने मैले जस्तो एक्लै आन्दोलन गर्नुपर्छ तर, आँट छैन भने बिमल गुरुंग सित भेट गरे भन्दै बिन सित्थैको कुराहरु गर्नु हुँदैन छत्र दाजुले”। यसै अवधी सुब्बाले आफूलाई जेलबाट बाहीर निकाल्नमा क्रामाकपाले सहयोग गरेको तिनलाई बताएको भन्दै सुब्बाको मुक्तिको निम्ति क्रामाकपाले होइन तर आफूले मुख्य मन्त्रीलाई व्यक्तिगत अनुरोध गरेर मात्र जेलबाट छुटाएको दाबी गरे| हाल सुब्बाको मुद्दा घिसिंग हम्लाकाण्डको मात्र सकिएको बताउदै तिनकटरोको मुद्दामा तिनलाई सरकारले जेलमा नै राख्न सक्ने थियो तर आफूले अनुरोधगर्दा छोडिएको गुरुङले थप दाबी गरे | यसै अवसरमा तिनले छत्रे सुब्बाको बन्चरोको प्रतिक भएको फ्याल्टर टोपी सुन्दर रहेको अनि सबैले उक्त टोपी मन पराउनु तर तिनको टाउकोमा भएको बुद्दी चाहिँ जिरो रहेको बिमल गुरुङले भने | तिनको पछि कोही लाग्न नहुने आह्वान गर्दै सुब्बाले पहिले कै जस्तो मान्छे मारेर अरुलाई फसाउने गुरुङले बताए | हाल क्रामाकपाले तिनलाई नचाउने काम गरेको आरोप लगाउदै सुब्बा यस्ता नेताहरुसित होशियार बस्नुपर्ने पनि तिनले बताए | यसै क्रममा यदि गोर्खाल्याण्डको मुद्दा अघि बढाउन आन्दोलन नै गर्ने सुब्बाको चहाना नै छ भने आफूसित आउ भन्दै मोर्चाको अहिंसात्मक नीतिमा बाच्नु पर्ने तिनले सुझाउ दिए | मोर्चा प्रमुख गुरुङले यदी भविष्यमा जीटीए गठन भए आफू सत्तामा नबस्ने दाबी गर्दै क्रामाकपा अध्यक्ष आर बी राई अथवा जीएलओ प्रमुख छत्र सुब्बा सत्तामा बस्न चाहे मोर्चाले राखिदिने पनि तिनले घोषणा गरे | तिनले गोर्खाल्याण्डको आन्दोलन कसैको पेवा नरहेको स्पष्ट पार्दै जनताको विश्वाश हुनपर्ने अनि जनताको विश्वाश नपाएकाहरु व्यर्थैको राजनैतिक पार्टीमा लागेर जनतालाई विश्वासघात नगर्नु भनी सुझाउ दिए | विगत दिनमा सुवास घिसिंगले कालेबुंगमा छत्र सुब्बा, सिके प्रधान र एन० टी० मोक्तानलाई अस्पतालमा लडाएर जनता मार्ने कार्य गरेको बताउदै जनता सचेत बस्नुपर्ने सुझाउ दिए | अरुको उक्साईमा लागेर सुब्बा जथाभावी कुद्ने कार्य नगर्नु भन्दै आफू गोर्खाल्याण्डको मुद्दा प्रति इमान्दारी रहेको अनि यदी आफूले मुद्दा बेचेको प्रमाणित गरे आफ्नो घांटी रेटीदिने भनि विपक्षी राजनैतिक दलका नेताहरुलाई बिमल गुरुङले चुनौती दिए | तिनले युवा मोर्चा कार्यकर्ताहरुलाई गोर्खाल्याण्ड आन्दोलनको निम्ति सतर्क बस्नुपर्ने आह्वान गर्दै यहाँ टास्क फोर्सले भूमिगत प्रशिक्षण दिने कार्य गरिरहेको आरोप लगाए | अहिले टास्क फोर्सले व्यर्थैमा जनता अल्मलाउने कार्य गरेको बताउदै मुद्दाको बहानामा जनतालाई भुलाउने कार्य गरिरहेको थप बताए | यसै अवधि गुरुङले आगमी १३ फरवरी देखि जीटीए गठनको दाबीमा सरकारलाई दबाउ दिनप्रत्येक आइतबार जुलुस निकाल्ने घोषणा पनि गरे | यहाँको टाउन हलमा आयोजित भू० पू० सैनिक मोर्चाको चौथो स्थापना दिवसको अवसरमा कालेबुंगका विधायक डा० हर्क बहादुर छेत्री, नगर अध्यक्ष एल० बी० परियार, गोजमुमो उपाध्यक्ष कल्याण देवान, भू० पू० सैनिक मोर्चा अध्यक्ष रमेश आले आदिले पनि सम्बोधन गरे| कार्यक्रममा गत वर्ष सिब्सु हत्याकाण्डमा शहीद बनेका परिवारहरुलाई मोर्चा प्रमुख गुरुङले संवर्धनापनि जनाएका थिए |