निर्दलीय प्रार्थी सञ्चबीरलाई बिसञ्चो पारेर गोजमुमो पार्टीको भयो कल्याण

सञ्चबीर मेरो आत्मिय भाई हुन – कल्याण देवान:

पोलिङ एजेन्ट नराखेको बुथहरुबाट हार भयो – सञ्चबीर सुब्बा

जनतालाई गोजमुमोले अवहेलना गर्ने छैन - डा आर बी भुजेल

डी के वाइबा, कालेबुङ, 2 अगष्ट: जीटीए चुनाउको आज फलाफल निस्कने साथ जीटीए सभाको सम्पूर्ण सिटहरु गोजमुमो पार्टीको दखलमा पुगेको छ। कालेबुङ महकुमा क्षेत्रको मोठ 9 वटा आसनहरुमा सम्पन्न चुनाउमा पनि अन्तत: मोर्चाले नै आधिपत्य जमाउँन सक्षम बनेको छ। कालेबुङको मोठ 13 वटा समष्टिहरु मध्ये 9 वटा समष्टिमा चुनाउ भए पनि यहाँको 8 वटा समष्टिहरुमा मोर्चाको जीत निश्चित रहेको थियो। तर 41 नम्बर गितडाब्लिङ निम्बोङ समष्टिमा भने मोर्चाले बिजय हासिल गर्न कडा संघर्ष गर्नु पर्‍यो। गोजमुमो अध्यक्ष बिमल गुरुङले खडा गरेका प्रार्थी कल्याण देवानलाई चुनावी मैदानमा चुनौति दिदै मोर्चाकै स्थानिय नेता सञ्चबीर सुब्बा निर्दलीय प्रार्थीको रुपमा खडा भएको कारण मोर्चाले उक्त समष्टिमा कडा संघर्ष गर्नु परेको हो।

जीटीए चुनाउमा सबैको केन्द्रबिन्दु बनेको 41 नम्बर गितडाब्लिङ निम्बोङ समष्टिबाट मोर्चा प्रार्थी कल्याण देवान नै बिजयी बन्न पुगेका छन। उक्त समष्टिमा मोठ 7 हजार 7 सय 77 मतदान भएको थियो भने गोजमुमो प्रार्थी कल्याण देवानले 4 हजार 95 मतदान पाएका छन। यता निर्दलीय प्रार्थी सञ्चबीर सुब्बाले मोठ 3 हजार 4 सय 18 मदान प्राप्त गरेका छन भने तृणमूल कङ्ग्रेस प्रार्थी ब्रुनो लेप्चाले 2 सय 64 मतदान प्राप्त गरेका छन।

मोर्चा प्रार्थी कल्याण देवानले प्रतिपक्षी निर्दलीय प्रार्थी सञ्चबीर सुब्बालाई 6 सय 77 मतदानको व्यवधानले पराजित गरेर उक्त समष्टिबाट बिजयी भएका छन। आज यहाँको एसयुएमआई बिद्यालयमा समपन्न मतगणना कार्यमा सबैको ध्यान कल्याण देवान अनि सञ्चबीर सुब्बा माथिनै रहेको थियो। उक्त समष्टिको मतगणनाको पहिलो चरणको फलाफल निस्कन्दा सञ्चबीर सुब्बाको बिजय निश्चित रहेको देखिएको थियो तर दोस्रो चरणमा सम्पूर्ण अडकलबाजी समाप्त गर्दै कल्याण देवानले बिजय हासिल गरे।

तीनजना प्रार्थीहरु रहेको उक्त समष्टिको पहिलो चरणको मतगणनाको फलाफलमा सञ्चबीर सुब्बाले 3 हजार 51 मतदान प्राप्त गरेका थिए भने कल्याण देवानले पहिलो चरणमा केवल 1 हजार 9 सय 17 मतदान प्राप्त गरेका थिए। पहिलो चरणको फलाफल घोषणा हुँदा मोर्चा प्राथी कल्याण देवान 1 हजार 1 सय 34 मतदानले पछि परेका थिए। यस अवधी मतगणना स्थानमा पुरै सन्नाटा छाएको थियो। अन्य समष्टिहरुबाट मोर्चा प्रर्थीहरु बिजय बनेर बिजयको नाराबाजी लगाईरहेको समयमा एकाएक सञ्चबीर सुब्बाले मोर्चा प्रार्थी कल्याण देवानलाई पछि पार्दा सबैको एकाएक मुटुको धडकन बड्नुको साथै सबैको बोली समेत बन्द भएको थियो। तर उक्त सन्नाटा धेरै समय सम्म रहन नपाउँदै दोस्रो चरणको मतगणनाको फलाफल घोषणा हुँदा सबै मोर्चा समर्थकहरु संगै कल्याण देवान पनि खुशीले जनता अघि हात हल्लाउँदै आनन्दले विभोर भएका थिए। मोर्चा प्रार्थी कल्याण देवान बिजय बनेको घोषणा हुनसाथै एकाएक मतगणना परिसरमा गोजमुमो पार्टी समर्थकहरुले “कल्याण देवान जिन्दाबाद, गोजमुमो जिन्दाबाद” को नाराहरु लगाए।

यता प्रतिपक्षी निर्दलीय प्रार्थी सञ्चबीर सुब्बालाई चुनावी मैदानमा पराजित गरेपछि पत्रकारहरुसित कुराकानी गर्दै गोजमुमो उपाध्यक्ष कल्याण देवानले बिजयको श्रेय जनता अनि गोजमुमो पार्टीलाई दिए। तिनले आफ्नो जित निश्चित रहेको थियो भन्दै यो जनताको जित हो भनि दाबी गरे। तिनले आफ्नो बिजयमा जनता खुशी बन्नु पर्ने बताउँदै जनताको खुशीनै आफ्नो अनि पार्टीको खुशी हो भनि बताएका छन।

तिनले उक्त समष्टिका जनताहरु निर्दोश रहेको बताउँदै जनतालाई न्याय दिने आफ्नो कर्तब्य रहेको बताए तथा कुनै पनि जनतालाई गोजमुमो पार्टीले अवहेलना नगर्ने बताएका छन। यसै क्रममा तिनले सञ्चबीर सुब्बा आफ्नो आत्मिय भाई रहेको बताउँदै केवल तिनले पार्टीको आचार सहिता पालन नगरेको कारण नै आज यस्तो परिणाम निस्केको पनि बताएका छन। यता यसै सन्दर्भमा गोजमुमो स्टडी फोरममा सदस्य एव 42 नम्बर रेली समथार समष्टिका बिजयी प्रार्थी डा आर बी भुजेलले पनि उक्त बिजय जनताको बिजय रहेको बताउँदै सञ्चबीर सुब्बाको पछि लाग्ने जनतालाई भिक़्टिम गरिनेछ भन्ने कुरा केवल अफवाह मात्र हो भनि बताएका छन। कुनै पनि जनतालाई गोजमुमो पार्टीले लत्याउँने कार्य गर्दैन भन्दै केवल निर्दलीय प्रार्थी सुब्बालाई मात्र पार्टीको नियम बिरुद्ध कार्य गर्दा पार्टीबाट निश्कासित गरेको जानकारी गराए।

अर्कोतिर चुनाउको परिणाम निस्केपछि निर्दलीय प्रार्थी सञ्चबीर सुब्बासित सम्पर्क गर्दा तिनले चुनावी मैदानमा आफ्नो पराजय भए पनि जनताको भने जित रहेको दाबी गरेका छन। तिनले दार्जीलिङ पहाडको 41 नम्बर समष्टिमा आफुले गणतन्त्रलाई कायम राख्न सकेको बताउँदै कतिपय पुलिङ बुथहरुमा आफ्नो पोलिङ एजेन्ट राख्न नसक्दा पराजयको सामना गर्न परेको बताएका छन। आफुले पोलिङ एजेन्टहरु राखेको बुथहरुमा निस्पक्ष चुनाउ भएको अनि उक्त समष्टिहरुमा जनताले निर्धक्क मतदान स्वेच्छाले गरेको कारण उक्त बुथहरुमा जनताले आफुलाई नै मतदान गरेको दाबी गर्दै केवल पोलिङ एजेन्ट नराखेको बुथहरुमा मात्र आफ्नो पक्षमा मतदान नभएको दाबी गरेका छन। पोलिङ एजेन्ट नराखेको बुथहरुमा जनताले अप्रत्यक्ष धम्किहरुको सामना गर्नु पर्दा आफ्नो पक्षमा मतदान नभएको बताउँदै यदि सबै बुथहरुमा जनताले स्वेच्छाले मतदान गर्ने अवसर पाएका भए आफ्नो बिजय निश्चित हुने बताउँदै यस कुराले यहाँ आफुलाई कुनै फरक नपार्ने अनि आफ्नो हारमा पनि ईमान्दार जनताहरुको बिजय रहेको दाबी सुब्बाले गरेका छन। यस अवसरमा तिनले सम्पूर्ण जनतालाई आभार व्यक्त पनि गरेका छन।

कालेबुङ महकुमा समष्टि क्षेत्रको मोठ 9 वटा समष्टिहरुमा कसले कति भोट पाए ?
समष्टिको नाम	गोजमुमो प्रार्थी		प्राप्त मतदान	तृणमूल प्रार्थी		प्राप्त मतदान			प्राप्त मतदान
छिबो टाँसीडिङ	काजिम छिरिङ भोटिया		7578	महेन्द्र गजमेर		923
अलगडा दलपचन्द	कल्पना तामाङ		8353	सुकबहादुर सुब्बा		896
लाभा लिङ्से	सी पी पौड्याल		5943	सी पी शर्मा		343
पेदोङ	दावा लेप्चा		7737	छेवाङ भोटिया		324
गितडाब्लिङ निम्बोङ	कल्याण देवान		4095	ब्रुनो लेप्चा		264	सञ्चबीर सुब्बा		3418
रेली समथार	आर बी भुजेल		9620	माईकल लिङदामो		600
गोरुबथान	चन्द्र योञ्जन		14242	प्रेम अधिकारी		1057
कुमाई समसिङ	सामुएल गुरुङ		6285	उर्गेन शेर्पा		382
रोङगो जलढका	लोब्साङ लामा		8773	पेमा दोर्जे मोक्तान		413
गोजमुमो पार्टीलाई प्राप्त मतदान		तृणमूल कङ्ग्रेसलाई प्राप्त मतदान			निर्दलीय			मोठ मतदान
72626 (89.39%)		5202 (10.60%)			3418 (4.20%)			81246 (100%)